ഇതെന്‍റെ ജന്മഭൂമി
===================
മഴനൂല് മീട്ടുന്ന മണിവീണയാണെന്‍റെ
മലയാളമുറങ്ങുന്ന ഭൂമി.
മണ്ണിലും വിണ്ണിലും മഴവില്ല് കോര്‍ക്കുന്ന
മഴത്തുള്ളി പെയ്യുന്ന ഭൂമി.
സഹ്യന്‍റെ വിരിമാറില്‍ അരുവികള്‍ അലന്കാര-
മാലകള്‍ ചാര്‍ത്തുന്ന ഭൂമി.
പുഴകളില്‍ അലകള്‍ വിരല്‍തുമ്പുകളാല്‍
കവിതകളെഴുതുന്ന ഭൂമി.
ഇത് മവേലിമന്നന്‍റെ മഹിമകള്‍ പാടും
പൊന്നോണമുണരുന്ന ഭൂമി.
അമ്പല നടയിലെ അരയാലിലകളില്‍
അരഞ്ഞാണമണിയുന്ന ഭൂമി.
ഇത് വയലാറും ഒവിയും ഒഎന്‍വിയും
ഇതിഹാസമെഴുതിയ ഭൂമി.
ഹിന്ദുവും ക്രിസ്ത്യനും മുസല്‍മാനുമായി നാം
ഇഴചേര്‍ന്നു വാഴുന്ന ഭൂമി.
മണ്ണിലീ ഭൂമിയിലിനിയൊരു ജന്‍മത്തി-
ലിനിയും പിറവികളുണ്ടെന്കിലപ്പൊഴും.
ഇവിടെ പിറക്കേണമീഹരിത ഭൂമിയില്‍
ഇനിയും മരിക്കണം മനുഷ്യനായ് മാത്രം.
No comments:
Post a Comment