കറുത്ത മഴവില്ല് !!!
കൂട്ടുകാരാ പോകയോ നീ -
പാതി വഴിയില്‍ പറയാതെ;
പാട്ട് പൂര്‍ണമാക്കാതെ നിന്‍ -
കഥയ്ക്ക്‌ പേര്‌ കുറിക്കാതെ .
അമ്മതന്‍ കണ്ണുകള്‍ എരിയും തിരിയായ്
എണ്ണയില്ലാതെ നീറുമ്പോള്‍ .
പെങ്ങളുണ്ടരികില്‍ മറ്റൊരു കോണില്‍
വിറച്ചു വിറച്ചു വിതുമ്പുന്നു .
അച്ഛന്റെ കല്ലറയ്ക്കരികില്‍ നിന്‍ ചുരുളുകള്‍
പുക തീര്‍ത്തു വാനില്‍ പടരുമ്പോള്‍ .
മഴതോര്‍ന്ന വീടിനെ കരയാന്‍ തനിച്ചാക്കി
പാദങ്ങള്‍ ഓരോന്നായ്‌ വിടചൊല്ലി .
ഞങ്ങളീസ്നേഹിതര്‍ ഈ പാവം മനസ്സുകള്‍
വിങ്ങുന്ന നെഞ്ചുമായ് പിരിയുന്നു .
മഴ വീണു കുതിര്‍ന്നോരീ ചെമ്മണ്ണുപാതയില്‍
നീയില്ലാതെ മടങ്ങുന്നു .
നല്ലൊരു നാളില്‍ നിന്‍ പുഞ്ചിരി കോര്‍ത്തൊരു
മഴവില്ല് നല്‍കി നീ കടന്നു വന്നു .
പിന്നൊരു നാളില്‍ കരിനിഴല്‍ വീഴ്ത്തി നീ
ആരോടും പറയാതെ കടന്നു പോയി .
മനസ്സില്‍ നിറയുന്ന മൌനവും നൊമ്പര-
പൂക്കളും ഓര്‍മ്മയില്‍ ബാക്കിയാക്കി .
ഈറനാം കണ്ണുനീര്‍ മുത്തുകള്‍ കോര്‍ത്തു
നിന്‍ അവസാന യാത്രയില്‍ യാത്രാമൊഴി .
